價格跌反令需求減

價格跌反令需求減
價格跌反令需求減 11月8日，周三。恒生指數回落128.07，收18811.24；成交四百八十九億九千五百多萬元。期指跌139點，收18784點。恒隆地產（101）跌8.07％，收十六元六角四仙，理由係公司配股。電盈（008）升6.89％，見五元一角二仙，外傳控制權易手方面可以順利完成。中國貿盈增人民幣添壓　　中國9月份外貿盈餘二百三十億美元，超過8月份一百八十八億美元。入口只升14.7％，至六百四十三億美元；出口則升29.6％，超過八百八十一億美元。人民幣又面對升值壓力矣。英樓價已偏貴　　英國樓價指數除以絕對通脹率，1990至95年跌幅達35％，但由1996年起升幅達120％（未加入通脹因素），可見過去英國樓價升幅幾咁大。其中又以倫敦升幅較大，因為成為金融中心。如加入通脹因素，倫敦樓價十年升幅接近200％【圖】。

未來英國樓價係點，我老曹木宰羊，但依家肯定已好貴。　　美國民主黨十二年來首次取得國會控制權，明年1月將控制四百三十五個議席，令殊仔日後通過法案方面困難度上升。
　　11月8日中期選舉前，美股連升四個多月，但共和黨仍輸畀民主黨，理由係2002年10月開始呢次美股上升，普通打工仔受惠唔大，主要受惠者係有銀士；但窮人擁有選票較有錢人多，佢地未必知道國會度做緊乜，只係唔乃奇殊仔。國會由民主黨控制後，殊仔權力被大幅削弱。近日道指升穿12000點，但殊仔支持度由2004年70％跌至37％（情況有如已故總統詹森。1966年道指由735點升至1968年1000點，但詹森支持度反而由50％以上跌至35％以下）。升市集中優質股顯示股民成熟　　值得注意係，1968年中期選舉後，1969年道指回落20％，上述情況會否2007年重演？2006年已近尾聲（最近我老曹已收到朋友送2007年月曆），至今為止股市出現七十年代至今第二長升市（最長一次係1989年6月至93年12月，共四年半）。　　油價回落，相信港股調整後仍有上升空間。同過去歷次升市唔同，呢次升市集中D管理良好、純利大升股份，而非全面升市，反映股民已好成熟，只有純利上升股份才受追捧，唔做功課投資者都幾難股市賺到大錢。2000年一役，大部分衝動派傷亡慘重，形成2003年至今升市表現如此理智。窮人同富人有乜分別？窮人永遠追求眼前利益，而唔顧長遠利益；富人眼點係點樣令資本按年升值25％。　　VIX偏低、道瓊斯工業平均指數與交通平均指數背馳、中期選舉共和黨失敗等等，都係令股市出現調整理由。呢次股市以行業盛衰為炒賣點，因此後市展望既無大升市，亦無大跌市。民主黨中期選舉中勝出，令石油股受壓，有人擔心民主黨重提向石油企業抽暴利稅，並要求殊仔從伊拉克撤軍令中東局勢緩和，兩者皆不利油價。今天石油市場涉及四萬億美元資金；加上油價狂升暴跌表現，有幾多財富石油市場內轉手？唔少人用盡種種方法去捕捉未來石油方向。一如其他商品，油價上升反而刺激需求增加（因人人增加石油存量），油價回落又可令需求回落（人人減少石油存量）。上述說法可能違反一般人相信經濟學。1983年港元貶值，人人到超級市場搶購日用品（包括我老曹母親）；當天我老曹報館寫文章叫人冷靜，唔好加入搶購日用品行列，返到屋企卻發現整個客廳都堆滿日用品，原來係太太車協助我母親到超市搶購日用品，一天內已去五次，買番來日用品真係三個月都用唔晒！當我老曹怪責母親「好做唔做」之時，佢話你未經歷過日治時代，唔知道物資短缺痛苦，依家花一萬元買回來一份安心，係值得！

從此我老曹知道，原來「物價上升可引發需求」（而非經濟學教「價格上升令需求下降」！8月至今油價跌幅超過20％，上述跌幅已足夠產生「油價下跌令人人減少石油存量」心理！D由今年年初六十美元一直買至今年7月七十八點五美元未平倉合約高達一百一十六萬三千六百二十八張，不但未有止蝕離場，反而愈買愈多，依家正面對重大虧損。持有航空股須面對止賺誘惑　　我老曹由市場仔開始，同時係鄧小平信徒，即「實踐是證實理論唯一真理」。經過1983年我老曹母親行為後，我老曹明白「價格上升可產生新需求，價格回落可令需求減少」。上述理論似乎好怪，但經過二十年體驗，發現幾實用，雖然有違經濟理論。鄧小平亦講過，「無論白貓黑貓，抓到老鼠就是好貓」。

　　我老曹繼續相信，油價將六十美元之間爭持，理由係冬季漸近，石油需求大，當明年春季需求下降，油價有機會見五十美元一桶。至於航空股，投資者依家已有利潤手，未來考驗係能否捱過止蝕唔止賺引誘。　　中國10月27日公布對原材料策略係︰入口稅大幅下降、出口稅逐步上升（減少負面影響而採用逐步上升政策），11月1日生效。打擊最大係煤，因為要抽出口稅5％，而入口稅由3-5％降至1％，對兗州煤業（1171）未來業績影響都幾大。中國政府透過稅制逐步糾正過去中國過分依賴出口及製造業去帶動經濟，轉向依賴內部消費。自5月份金價回落後，我老曹建議大投資方向改變去配合中央政策，呢D叫做「政治市」。
港人自由經濟制度下長大，或者有D唔習慣。須知道中國經濟仍係半市場經濟、半計劃經濟，中央政策對個別行業盛衰仍有舉足輕重影響（唔信睇2004年中央政策全力支持造船後廣船〔317〕股價表現！），以及近年為開放金融市場而對內地銀行業支持。2008年北京奧運，相信2007年應有政策支持內地航空業加速成長。國家策發會中國影響力，遠超過聯儲局對美國經濟影響，因為美國經濟較自由，政府只能透過稅制、價、利率去影響經濟；中國政府可透過制定政策去決定一個行業盛衰。

中國製造業已見頂

中國製造業已見頂　

　工業化係一個國家或地區財富迅速增長不二法門，但最終係走向依賴內部消費去維持本身經濟增長。呢個過程由英國工業革命開始，到美國製造業興起、日本經濟戰後繁榮、亞洲四小龍，然後到今天中國。香港八十年代初期，工業化已走到盡頭；加上中國改革開放政策，令香港經濟迅速進入內部消費時代。去年製造業只佔本港GDP 5％、服務業佔84％，其他自個人及政府投資。去年中國農業佔GDP 16.5％、製造業佔39％、服務業佔32.5％，投資所佔比重仍十分大，情況同七、八十年代香港相似。

當年地鐵、十年建屋計劃、道路興建等等設施，都由七十年代開始，到1990年達高潮，餘下大型工程只有赤角（此乃點解本港上市建築股由1994年起走勢一年不如一年）。今天香港經濟盛衰完全由消費決定，中國則由工業、投資及服務業三大行業決定。長遠而言，中國經濟工業及投資佔GDP比重將下降，服務業則進一步提升，情況一如香港過去二十年。香港製造業1980年見頂，相信中國製造業2003年亦見頂，以後係漫漫長路，由製造業轉向內部消費帶動經濟。香港經濟轉型好順利，因為巧遇中國改革開放政策；中國經濟轉型比較困難，因為冇香港相同機遇。

散戶開始忍唔住手

11月9日，周四。恒生指數升141.62，收18952.86；成交四百七十一億一千多萬元。11月期指收18965點，升181點。　　中國航空（753）董事長李家祥話，國航今年載客量升17％，至三千五百萬人次；股價升1.78%，見四元。中國10月份乘用車銷量升28.2％，達五十七萬六千三百輛；年產量升41.2％，達四十二萬二千輛。華潤電力（836）升7.2％，見十一元二角六仙。佐丹奴（709）升7.8％，見四元一角七仙，因瑞銀推介。合新（754）回落5.8％，見十七元六角八仙，新加坡政府計劃以十七元五角至十七元八角出售七千五百三十萬股。


聯想（992）升 2.1％，見三元四角六仙。後市仲係個別發展。值得注意嘅係二線股紛紛抬頭，代表散戶再忍唔住手，開始入市了。恒指O最高見22倍　　恒指幾高才算最高？以指數計會誤導，以O睇十九倍，O又算唔算高（O八至十二倍算偏低；十二至十六倍算合理；十六倍至二十二倍算高）？大市已進入偏高期，但未算最高，因O未見二十二倍。美國企業今年第三季純利平均升15％，係連續第十七季雙位數字上升，上述業績支持美股繼續向上爬。家吓小心謹慎係需要，但睇淡未免太武斷（投資者切忌睇好或睇淡，尤其近年流行炒行業、炒個別企業業績，可同時睇好甲股、睇淡乙股）。投資市場已到咗精耕細作期，粗枝大葉嘅分析，各位可以不理。

　　2002年起經濟復甦最大嘅受惠者係企業，連續十七季純利雙位數字上升；反之，打工仔受惠唔大（至今加薪幅度好細）。踏入2006年，打工仔才獲比較合理嘅薪酬調整，此乃近期 CPI上升嘅理由；如扣除2001年至今美元滙價跌幅，打工仔薪酬比較2000年仍係負增長，因此而推高CPI多少，係咪值得大驚小怪而加息，去壓抑 CPI升幅至年率1％至2％？OECD國家工作外判到低勞工成本國家或地區，企業因重組而減少人手（尤其係中層人士）。响經濟環球化壓力下，企業必須同低工資地區公司競爭，都係過去壓抑工資及薪金上升嘅因素。本港1980年有關壓力主要集中喺勞工身上（因工廠內移），1997年回歸後香港白領都感受到上述壓力，令香港社會走向20╱80時代。近年內地工資及薪金以年率15-20％速度上升，香港又如何？除金融業、會計界受惠於大量新股上市外，大部分打工仔工資或薪金升幅只有2％至5％一年；今年起隨着失業率下降，工資及薪金出現較合理調整，不應大驚小怪，社會經濟繁榮應人人共享，而非集中喺20％人口，所以其餘80％人口都應有份。

如上述趨勢持續，則CPI喺可見將來唔易大幅回落，亦即美國減息嘅日子較估計中遠！受薪金上升影響，估計明年標普五百企業純利升幅只有9.9％（首次少於雙位數）；企業純利升幅放緩，O可能向下炒，對股市影響會點真係有排計。專家話標普五百指數明年有機會下調7.2％……係咁咋嘛？唔好畀嗰D危言聳聽嚇親。後市展望應該繼續窄幅牛皮個別發展，調整隨時可以出現，但出現大跌市嘅機會好微。美金融業花紅和味惠及豪宅　　高盛、大摩、美林、雷曼兄弟、美亞證券等大行，包括花旗銀行、摩根大通、美國銀行等，計劃今年向十七萬三千名僱員發放三百六十億美元花紅，較去年上升 30％。今年金融業僱員肯定過肥年，平均每位僱員獲十六萬五千美元花紅，認真唔係少嘢。至於全行金融業，估計今年花紅平均上升18.2％，美國最高薪人士今年花紅可能達五千萬至一億美元，所以美國豪宅、倫敦豪宅仍不愁冇買家；至於普通打工仔，今年加薪幅度仍然十分有限。世間財富從來唔係平均分配。

　　美國中期選舉結果一如大部分人事前預計，股市出現半日回落反應已經足夠，之後又再窄幅牛皮、個別發展。民主黨控制國會後，最受影響行業有藥物股、軍事工業股及大石油公司，受惠者有生物化學股及替代能源股；其他行業應該冇多大影響。其次係中國可能面對美國較大政治壓力要人民幣升值，對港股短期影響反而有利（炒人民幣升值，資金又再湧入港股）。民主黨控制國會對美國政治嘅影響估計：

一、美國對伊拉克政策改變（如太早撤軍，伊拉克隨時爆發內戰；如唔撤軍，美國人已普遍厭戰，對2008年大選不利）。

二、貧富兩極化漸成政治問題，未來稅制可能唔再對富有者有利。三、美國房屋完成軟着陸嘅機會進一步增加，但通脹率更難回落。民主黨揸弗有錢佬可長命D　
　民主黨控制國會後，遺產稅將重新檢討。依家所有美國人喺2006至08年死亡、財產超過二百萬美元者，都必須交遺產稅，今年稅率係46％，2007至 09年係45％；2009年放寬至三百五十萬美元才須交，但2010年起又收窄至一百萬美元都要交遺產稅，稅率55％。做美國人而又有蚊年，最好喺 2009年嗰年死，因為有三百五十萬美元免稅額；如喺2010年才死，咁就大件事，免稅額減少至一百萬美元，同時稅率提高至55％。美國有錢佬真係早死好過遲死！不過，民主黨控制國會後形勢有變，佢地主張2010年後免稅額提升到五百萬美元，上述修改應可以喺2008年完成。換言之，民主黨控制國會後，美國有錢佬又可以長命D也。
　　如果你係有錢佬，最好做香港人（因為香港已冇遺產稅）；如做美國人喺2010年後死，要畀政府攞走55％身家，都勿話唔傷，此乃點解美國有錢人要成立基金，或美國人亦要移民嘅理由。

霍英東係地產界英雄

霍英東係地產界英雄　　五十年代香港地產買賣並唔活躍，理由係買賣以整幢物業為主。1953年石硤尾木屋區大火，政府為鼓勵私人資金參加建屋計劃，宣布容許新建成物業可以分單位出售（但舊樓仲未可以）。當年霍英東睇到機會來臨，立即成立霍興業堂置業，當年註冊資本四百六十五萬，只有佢同太太呂燕妮為股東。第一幅購入嘅土地係利希慎家族喺銅鑼灣鵝頸山嘅使館大廈（當年租畀外國駐港大使做領使館兼住宅，係當年銅鑼灣區最高嘅大廈，代價二百八十萬元）。第二次投資係九龍油麻地榕樹頭四方街至東莞街一幅十萬多呎土地，每呎地價二十元，前身由嘉道理家族喺清朝前購入，買入目的係將之興建為住宅出售。1954年佢成立立信置業有限公司，專門建造及買賣樓宇，當年一般香港人月入二百多元，四方街所建物業五層高，平均每個單位八百多呎，售價一萬四千至三萬六千元；當年喺香港租樓要頂手費，一般頂手費已達七千元，依家一萬四千元已可做業主，自然好吸引，第一期推出好快便賣清。但霍英東仍未甘心，第二期推出便採用分期付款法：首期50％、物業建至二樓再付10％、三樓10％，到完成入伙付清，即今天我地叫做「賣樓花」。四方街因此成為本港第一個地盤開始預售樓花計劃。四方街共建成一百多棟物業，共六百多個單位，約五十多萬呎樓面，上述一個地盤喺一年多時間內賺咗六百多萬元（當年係十分驚人嘅數字），而且資本唔多（因建築費嚟自賣樓花），引發本港樓市興旺期，因其他人亦學習。1955年佢再將銅鑼灣物業改建成為十七層高嘅蟾宮大廈，係當年香港最高嘅住宅大廈，並設有電梯。至此霍英東已賺入超過一千萬元，亦引發全港炒地皮潮。1965年1至2月因政府宣布管制炒樓而引發銀行擠提事件，霍英東因借錢唔多影響唔大，但對其他地產商打擊甚大。1965年6月 8日由霍英東發起地產商會，全港六十八個大地產商包括屈武圻、史丹利、胡漢輝、哥頓胡父親、陳德泰（大昌地產前主席）、鄭翼之、曹紹松、楊志雲、李康節、王寬誠、方潤華等，以示團結，並努力阻止地價進一步下跌。政府修例後宣布，1966年以後入伙嘅樓宇地盤面積須較1965年前少20％樓面，令地價進一步下跌，本港物業市場由高峰回落，地產商進一步受壓。不但如此，1965年政府推出金鐘地段二十七英畝土地全球招標出售，由於土地面積太大，冇外資入標，只有霍英東一人入標，結果政府宣布取消拍賣。霍英東認為香港政府一再針對佢，開始心灰意冷，1967年2月將霍興業堂股權轉畀妹妹、妹夫、子女及親屬及公司職員，自己去咗遊埠大半年。1967年5月6日九龍新蒲崗人造花廠工人罷工，政府派出二百多名防暴隊武力驅散工人，後來演變成香港暴動。霍英東另一項物業星光行1962年同三個財團合作，共投資三千萬元（霍英東佔一千七百五十萬元），卻咁啱喺當時落成。為吸引租戶，霍英東決定以每呎月租九角出租，預備捱落去，點知當年電話公司通知星光行租戶接通電話方面遙遙無期，至此霍英東意興闌珊，第二年以三千七百五十萬元將星光行賣畀置地公司，開始一步步退出本港物業市場。反之，新興一批華資地產商如郭得勝、羅鷹石、李實發、鄭裕彤、李兆基、王德輝等喺1967年暴動後大量投資本港房地產，並透過將地產公司上市集資做大，成為今天嘅大型地產公司。五十年代本港大地產公司到依家仍出色者，只有由哥頓胡後期新組成嘅合和實業（054），其餘大部分地產公司喺1967年受過暴動打擊後都冇做大。到底係英雄造時勢，抑或時勢造英雄？到底係霍英東當年政治立場被政府強加對付後心灰意冷，還是經過銀行擠提潮及香港暴動打擊後，五十年代大地產商已失去勇氣，令暴動之後才大做地產生意嘅新一代後來居上？冇人可以回答。　　潮起潮落，不知淘盡幾許英雄好漢。大家能否一杯紅酒、幾個良朋知己細說當年，幾許江湖事皆付笑談中？五十多年香港樓市風雲，造就咗本港唔少英雄好漢，亦傷盡了幾多人嘅心？前塵往事，到咗今天都成為香港歷史嘅一部分，幾許繁華又幾許蒼涼都成為過去。當年嘅地產界英雄，亦離我地而去。連年戰亂令非洲貧窮　　今年非洲環撒哈拉一帶，已成為高風險、高回報地區。各國紛紛豁免呢D國家債務；加上原材料有價，令呢D國家成為投資者新寵。八、九十年代政變及內戰，令呢D國家經濟弄至一塌糊塗；進入二十一世紀，情況正在改變，這些地區股市近年升幅已超過100％，但O仍喺八倍至十二倍，十分有吸引力嘅水平。分析家估計，明年環撒哈拉一帶國家股市仍有上升24％嘅機會！各位有冇興趣去非洲冒險？分析家認為，過去十年係中國同印度嘅，未來十年係越南及非洲環撒哈拉一帶嘅，你信唔信富貴險中求？另一方面，過去半年南非蘭特已失去五分一價值（同期美元滙價回落，如以其他貨幣計跌幅更大），呢段日子金屬價格上升，理論上有利南非經濟，點解蘭特滙價表現咁差？理由係黑人政府推行歧視白人政策，令大量有技能嘅白人離開，造成南非經濟不前。證明咗一個地區經濟繁榮與否，同擁有資源關係唔大，而係取決於人才！呢幾個月我老曹個女去咗非洲，發現當地情況同想像大為不同。原來非洲農產品十分豐富兼好便宜，只因缺乏基建，好難運出口賺外滙；即使埃塞俄比亞，除咗20％地區乾旱外，80％國土仍係綠油油一片，但長滿野草。點解農民唔去耕種而將土地荒廢？理由係連年戰爭，每當收割之時武裝分子便嚟搶，農民索性唔耕田！非洲人貧窮嘅理由唔係土地唔肥沃，而係當地政府忙於打仗，為軍費而向人民苛徵稅，典型「苛政猛於虎」。中國政府近年推行政策，有助非洲各國和平穩定下來，或可擺脫貧窮。

中國2010年可買起全美農地

中國2010年可買起全美農地　　中國已擁有一萬億美元外滙儲備。美國最肥沃嘅土地喺堪薩斯州，大約賣一千二百六十五美元一公頃．較差者賣五百五十美元一公頃；以平均價九百美元一公頃計，堪薩斯州共五千二百三十六萬公頃農地，約值四百七十一億二千四百萬美元。中國手上嘅外滙儲備足夠買下美國二十一個類似堪薩斯州嘅農地，如此一來，美國三分二農地可被中國買去？
　　或者中國只有興趣美國上市嘅大企業。道指三十間大企業加起來總市值三萬億美元，即今天中國可以收購十間美國大企業（或做三十間大企業嘅最大股東，各佔35％，控制美國經濟）。　　依家中國只揸美國債券，以五厘計，每年可收息五百億美元或每天一億三千七百萬美元（連假期）。美國政府支付利息亦有困難。
　　共產主義制度國家中國，利用資本主義制度，經過二十八年努力，便可買起美國。美國唔好輸畀共產主義，而係輸畀資本主義；世界有時都幾搞笑。未來三、五、七年，中國外滙儲備仍會上升，而且愈升愈快，以每月二百億美元嘅速度上升，估計到2010年已達二萬億美元，可以買起全個美國農地！有一天唔係中國打敗美國，而係中國買起美國！

內地廠商抽資回港

內地廠商抽資回港 11月10日，周五。恒生指數跌61.72，收18891.14；成交五百四十五億三千七百多萬元。11月期指低水，收18817點，跌148點。聯想（992）跌11％，收三元零八仙，為2004年11月16日以來最大跌幅，主因係7至9月獲利由上年同期四千五百萬美元下滑至三千八百萬美元。聯想犯上TCL同樣錯誤　　TCL （1070）1982年中國生產錄音帶，其後漸漸發展成為國內電視機大型生產商。兩年前收購法國Thomson Electronic組成TTE，成為全球最大電視機生產商，結果第一年虧損五億九千九百萬元，第二年首三季虧損十五億元，可以話已將TTE股本50％蝕掉，今年10月31日宣布退出歐洲市場。問題在於TTE仍生產陰極射管型電視而非平面電視，上述電視只能發展中國家以低價出售，歐洲人已好少購買舊款電視，TCL收購回來只係過氣生產設施。上述情況，聯想似乎又再犯上，明年1月微軟推出Vista程式，行64 bit（依家軟件行32 bit），令新一代個人電腦運作速度大幅提高，聯想去年收購返IBM個人電腦業務，明年會否過時？　　中國國務院副總理曾培炎北京話，今年中國GDP增長率仍超過10％、CPI增長率低於2％；今年4月至今中國已兩次加息、去年6月至今已三次提高銀行存款準備金。6月開始中國固定資產投資降溫，令全球原材料價格回落。高盛集團商品指數過去三個月已下降19％（去年升26％）。　　美元價回落，而日圓上升。中國政府否認將外儲備分散到其他貨幣，相信係受日本11月16日將開會決定日圓利率影響。依家四十五個分析員中，只有十個估計下周日圓利率會改變。美國外貿赤字9月份減少6.8％，至六百四十三億美元（8月份六百九十億美元），係2001年2月以來最大跌幅，主因係石油入口減10.5％，至二百六十三億元，部分理由係油價回落三點六美元一桶，平均價六十二點五二美元。美國9月份總入口減2.1％，至一千八百七十五億美元；出口升0.5％，至一千二百三十二億美元。11月初美國消費信心亦降至92.3（10月份93.6）。　　委內瑞拉總統查韋斯公開發言，表示佢地會努力保持油價五十美元以上！委內瑞拉係美國第四大石油供應國，亦係OPEC內鷹派，過去亦係委國要求維持油價六十美元！油價六十美元反覆後，明年目標價五十美元睇法唔使修改。今天油價升2.2％，報六十一點一六美元，創10月25日以來最高價，但技術表現一般【圖】。　　瑞信分析師研究報告中指出，本港地產商面臨長期獲利下沉局面，理由係香港以前最大土地供應商—香港政府已停止定期土地拍賣，香港地產開發商只有到內地尋求土地。今天新地（016）跌1.5％，報九十元二角五仙；恒隆地產（101）跌1.9％，報十六元四角。瑞信指出，希慎興業（014）目標價二十一元七角五仙；新地目標價八十八元八角，但睇好鷹君（041），因為寫字樓租金仍在上升。恒基地產（012）被評為跑輸大市，目標價四十二元六角；恒地手上土地只夠一點八年開發，而過去則為足夠四年之用。　　展望明年，美國GDP增長率將放緩，但唔係衰退，股市或有調整，但唔係大跌市。如明年利率下調，又可抵銷部分GDP增長放緩影響，相信大市仍平穩發展。至於個別行業、個別企業，升降幅度便好大，尤其中國政府正逐步取消低附加值產品出口退稅；加上珠三角一帶最低工資上調、電費上調、運輸成本上升，數千間中小型工廠正面對重大虧損。內地製造業已進入資本主義發展第二階段，即達爾文《進化論》所指：物競天擇，適者生存；弱肉強食早已開始。呢Ｄ內地工廠一般資本幾千萬元，過去主要為大廠代加工，依家正面對被淘汰威脅，唔少已將資金抽調回港，以便必要時放棄內地工廠（過去幾年已捱得好辛苦，家更失去出口退稅兼工資上升，真係想做都冇得做）。呢Ｄ資金回港後，部分投入股市。所謂「生意淡薄、不離賭博」，形成近日股市上升。由於訂單漸集中在內地大廠，唔少工業股已感受到上述壓力，而且呢次升市中股價多表現欠佳。　　金磚四國（巴西、俄羅斯、印度及中國）共三十億人口國家，聯合國估計到2050年將有二十億人進入中產階級。此一改變既快且急，對全球經濟影響好大，亦帶大量投資機會，當然風險亦唔少。港股未來每天成交可達千億　　我老曹七十年代欲去美國睇（例如睇華爾街到底係點）而申請信用卡，信用卡公司問我老曹係咪年薪十五萬元（七十年代，十五萬可以買一層樓），我老曹當然冇；然後問你有冇一百萬財產？答案亦係否定，結果因未符資格而唔獲批准，最後只有麻煩相熟銀行經理做擔保人，才到一張信用卡……。到今天，香港信用卡，幾乎有身份證都得到！上述情況上海開始重演，過去上海張信用卡，真係驗身咁驗；近期上海街頭開始見到銀行職員派信用卡申請表格，相信唔使幾耐，上海同香港一樣，信用卡係人都有。香港人口唔夠七百萬，卻擁有超過一千萬張信用卡，即每位成年人平均擁有兩張或以上；中國十三億人口，最近數字係信用卡數目才剛超過一千萬張，理論上二十年後中國信用卡數目應超過二十億張，即上升二百倍，而且中國將成為全球最大消費市場！中國金融市場下月開放，外資銀行必引入大量金融產品，國內銀行亦做好準備。中國明年將進入金融新世代，競爭將十分激烈，同時業務發展一日千里，二十年後中國面貌係點？相信同今天香港接近，但放大二百倍！昨天一位年輕人問香港金融業後市係點，依家每天成交五百億元算唔算多？記得1969年，即我老曹入行兩年後，有一天香港證券交易所成交四千多萬元，當天老闆已請全公司職員去香港仔食海鮮。其後遠東交易所成立，1973年有一天成交幾十億元，當天主席李福兆已接受報章訪問。1986年聯交所成立，漸漸出現每天一百億元成交。今年開始每天成交五百億元，相信不久將來一千億元成交一天，甚至更大數字亦有可能。因為香港已成為中國金融中心！